ناوه‌ڕۆك
نێچیرڤان بارزانی کێیە؟
نێچیرڤان ئیدریس بارزانی کوڕی گەورەی ئیدریس بارزانی برای مەسعوود بارزانییە (بە ئینگلیزی: Nechirvan Idris Barzani)، لە بەرواری ١٩٦٦/٩/٢١ لە گوندی بارزانی هەرێمی کوردستان لەدایکبووە، یەکێکە لە سیاسەتمەدارە دیارەکانی کورد و پارتی دیموکراتی کوردستان و جێگری سەرۆکی پارتی دیموکراتی کوردستانە، لە ڕۆژی ١٠ـی حوزەیرانی ساڵی ٢٠١٩ بووە سەرۆکی هەرێمی کوردستان.
ژیان
نێچیرڤان ئیدریس کوڕی ئیدریس بارزانی و کوڕەزای مەلا مستەفای بارزانییە، دایکی ناوی نازدارە و کچی حەمەی ئەوڕەحمان ئاغایە کە یەکێکە لە بنەماڵە دێرین و بابانیەکانی سلێمانی، لە ١٩٦٦/٩/٢١ لە گوندی بارزان لەدایکبووە، لە ساڵی ١٩٧٥ بەهۆی نسکۆی شۆڕشی کوردەوە ئاوارەی وڵاتی ئێران دەبێت و لەوێ لە زانکۆی تاران زانستە سیاسیەکان دەخوێنێت، لەدوای کۆچی دوایی باوکی بەشداری شۆڕش دەکات و لە ساڵی ١٩٨٩ دەبێتە ئەندامی مەکتەبی سیاسی پارتی دیموکراتی کوردستان، لە ساڵی ١٩٩٦ دەبێتە جێگری سەرۆکی حکوومەتی هەرێمی کوردستان و لە ١٩٩٩ دەبێتە سەرۆکی حکوومەتی هەرێم لە حکوومەتی هەولێر، دواتر لەگەڵ یەکگرتنەوەی هەردوو حکوومەتی سلێمانی و هەولێر نێچیرڤان دەبێتە سەرۆک وەزیرانی هەرێمی کوردستان هەتاوەکوو ساڵی ٢٠٠٩.
نێچیرڤان بارزانی لەگەڵ نەبیلە بارزانی کچی مەسعوود بارزانی ژیانی ھاوسەری پێکھێناوە و سێ کوڕ و دوو کچی هەیە کە گەورەترینیان ناوی ئیدریسە و هەریەک لە ڕانیە، چیاڤان و مایا منداڵەکانی ئەوان، جگە لە کوردی، زمانی فارسی باش دەزانێت، ھەروەھا عەرەبی و ئینگلیزی دەزانێت، حەزی بە کتێبی مێژوو و فەلسەفە و شیعرە بەتایبەت شیعری کوردی و فارسی، ڕۆژانە بەپێی پێویست و کات وەرزش دەکات.
سەرۆکی حکوومەت
نێچیرڤان بارزانی زۆرترین ماوەی سەرۆکایەتی حکوومەتی کردووە کە ماوەکەی گەیشتە ١٥ ساڵ، لە ١٩٩٩/١٢/٢٠ هەتاوەکوو ٢٠٠٥/٦/١٤ سەرۆکی حکوومەتی هەولێر بووە و دواتر لە ٢٠٠٦/٥/٧ دەبێتە سەرۆک وەزیرانی حکوومەتی هەرێم هەتاوەکوو ٢٠٠٩، دواتریش لە ٢٠١٢ دووبارە دەبێتەوە سەرۆک وەزیران هەتاوەکوو ساڵی ٢٠١٩.
ساڵی ٢٠٠٨ لەلایەن کۆلێژی وانشتۆن، جێفرسۆنەوە دکتۆرای فەخری و دواتریش نیشانەی شکۆمەندی شاژنی بەریتانیای پێدەبەخشرێت.
