ناوه‌ڕۆك
باوکی بێباوکان
کە‌نعان نە‌جمە‌دین ئە‌حمە‌د ناسراو بە حاجی کاروان لەدایکبووی ١٩٧٠ـی گەڕەکی ئیمام قاسمی شاری کەرکووکە، زۆرینەی قۆناغەکانی خوێندنی بەسەرکەوتوویی بڕیووە، لە ساڵی ١٩٩١ـی زایینی شاری کەرکووک جێدەهێڵێت و ڕوو لە شاری ھەولێر دەکات لەگەڵ ڕێکخراوی خێرخوازی ڕابیتە‌ی ئیسلامی کورد دەست بەکاری خێرخوازی دەکات، لە ٤ـی نیسانی ١٩٩٤ حاجی کاروان بەیاریدەدەری هەریەک لە عەبدوڕەحمان سدیق و ئوسامە جەمیل ڕادیۆی دەنگی یەکگرتوویان دامەزراند، لە ساڵی ١٩٩٧ بووەتە بەڕێوبەری ھەمان ڕادیۆ.
کاری خێرخوازی و سیاسی و بانگەواز
لە ساڵی ١٩٩٩ بەمەبەستی کاری بانگەواز سەردانی ئەورووپا دەکات و لەوێوە کاری بانگەوازی ئەو دەست پێدەکات، و لە ساڵی ٢٠٠٣ گەڕایەوە کوردستان و درێژەی بەکاری خێرخوازی و بانگەواز کردن دایەوە، و لە ساڵی ٢٠٠٤ بە هاوکاری سوهەیب جەمیل هەستا بە دامەزراندنی ڕێکخراوی بەختەوەری، لە ساڵی ٢٠١٠ لە ھەڵبژاردنەکانی پەرلەمانی عێراق خۆی پاڵاوت لە لیستی یەکگرتووی ئیسلامیی کوردستان بەڵام دەنگی پێویستی نەھێنا و دەرنەچوو وە بەمەش درێژەی بە کار و چالاکییە خێرخوازییەکانی دا
خاوەن ئیمتیازی گۆڤاری بەختەوەرییە کە گۆڤارێکی ئایینی و گەشەپێدانی مرۆییە و ھاوکات خاوەنی دەزگای بەختەوەریی خێرخوازییە و پێشکەشکاری تەلەفزیۆنیشە لە کەناڵی ئاسمانی سپێدە و چەند کەناڵێکی ناوخۆیی کوردستان، بۆ ھەڵبژاردنی پەرلەمانی کوردستان، خولی چوارەمی پەرلەمانی کوردستانی ٢٠١٣ لەلایەن یەکگرتووی ئیسلامیی کوردستان ھەڵبژێردرایەوە و لەدوایشدا کە ئەنجامەکانی دەرچوو ناوبراو بە زۆرینەی دەنگەکانی یەکگرتوو سەرکەوتنی بەدەست ھێنا و بووە ئەندام پەرلەمانی کوردستان لەسەر لیستی یەکگرتووی ئیسلامیی کورستان و ئەندامی لیژنەی کاروباری کۆمەڵایەتی و منداڵ و خێزان و لیژنەی ئەوقاف و کاروباری ئایینی بووە.
پێگەی کۆمەڵایەتی
حاجی کاروان یەکێکە لە دیارترین مرۆڤەکانی نێو کۆمەڵگای کوردی و کەسێکە خاوەن بیری میانڕەوە و لە زۆربەی کاتەکاندا هاوکاری بێباوکان و بێ سەرپەرشتان و خێزانە هەژارەکان بووە بەبێ بینینی جیاوازی بیروبۆچوون و ڕەوت و ئایین، ساڵانە لەڕێی ڕێکخراوەکانەوە چەندین ملیۆن دینار بە بێباوکان دەبەخشێت و لە ساتی کرانەوەی قوتابخانەکاندا، لە بۆنە و ئاهەنگ و جەژنەکان جلوبەرگ و پێداویستی تایبەتیان بۆ دەکڕێت و پێیان دەبەخشێت.
