ناوه‌ڕۆك
سەرەتا
لە هاوسەرگیردا جگە لە هاوسەر دەبێت پەیوەندیت لەگەڵ خێزانەکەشیدا گونجاو و باش بێت، لە ماوەی دەستگیرانداریدا کاتێک بۆ یەکەمجار بنەماڵەی هاوسەرەکەت دەبینیت دەبێت ڕەفتاری جوانی تۆ لە مێشکیاندا جێگیر ببێت و هەر لە سەرەتاوە خۆت بسەلمێنیت.
چۆن لە ماوەی دەستگیرانداریدا پەیوەندیت باش بێت لەگەڵ ماڵی هاوسەرەکەتدا؟
بناغەیەکی باش دابنێ
بناغە سەرەکیترین شتە لە هەموو بوارێکدا، بابەتی هاوسەرگیری و ناسینی خێزانێکی نوێ پێویستی بە بناغەیەکی پتەو هەیە بۆیە سەرەتاکەی گرنگترە و ڕێز لە خۆت و هەموو کەسێک بگرە.
بابەتی بچووک گەورە مەکە
لەسەر هیچ بابەتێکی بچووک زۆر مەڕۆ و گەورەی مەکە چونکە دواتر پەشیمان دەبیتەوە، لەجێی گەورە کردنی بابەتەکان هەوڵبدە هەمیشە ڕێگا چارەت پێ بێت بۆیان.
پشتگیری هاوسەرەکەت بکە
هەرگیز هاوسەرەکەت ناچار مەکە کە لە نێوان تۆ و خێزانەکەیدا یەکێکتان هەڵبژێرێت و ئەگەر هاتو کەسێکیش لەناو خێزانەکەی ئەو ئازاری تۆی دا بە هاوسەرەکەت مەڵێ کە پەیوەندی لەگەڵدا بپچڕێنێت چونکە لە کۆتاییدا ئەوانیش کەسوکاری هاوسەرەکەتن.
وێنەیەکی جوانی خۆت پیشان بدە
لە کاتی قسەکردن و چاوپێکەوتنەکانی پێش هاوسەرگیری لەگەڵ بنەماڵەی هاوسەرەکەت نواندن مەکە و خودی خۆتبە، ئەوەی نواندن دەکات کەمتر دەچێتە دڵەوە و کاتێک خودی سروشتی خۆت بیت و ڕۆژێکیش ئەوە هەر دەردەکەوێت و ناتوانیت تاکوو کۆتایی تەمەنت نواندن بکەیت.
ڕێزی پێگە و کەسایەتییان بگرە
ڕاستە ئەوانیش بوونەتە بەشێک لە خێزانی خۆت بەڵام زووە بۆ ئەوەی کە زۆر تێکەڵیان ببیت و لە سنوور لابدەیت هەندێک جار، هەمیشە بە ڕێزەوە قسەیان لەگەڵدا بکە و دوورکەوە لە زۆر قسەکردن و گاڵتەی بێ مانا کە لە ئاستی تۆدا نەبێت.
ڕێزی خۆت بگرە
هەمیشە پێش هەمووان ڕێزی خۆت بگرە و کاتێک باسێک دێتە ناوەوە کە پەیوەندی بە خێزانی خۆیانەوە هەیە، قسەی تێدا مەکە و هیچ جۆرە وەڵامدانەوەیەکت نەبێت، چونکە ئەگەر لەوکاتەشدا لە باشی خۆت شتێک بڵێیت و بتەوێت یاریمەتیدەر بیت لەوانەیە بە هەڵە تێبگەن ئەویش بە هۆی ئەوەی کە هێشتا بە باشی ناتناسن.
هاتوچۆت سنووردار بکە
لەماوەی دەستگیرانداریدا سنوورێک دابنێ بۆ هاتوچۆت، هاتوچۆی زۆر و بەردەوامت کێشەت بۆ دروست دەکات و سەردان نەکردنیشیان بە هەمان شێوە جوان نییە، هەر بۆیه واباشترە کە سەردانیان بکەیت بەڵام بە ڕێژەیەکی کەم.
دوورکەوە لە بیری خراپ لەسەر خەسوو
هەمیشە وا وتراوە کە خەسوو خراپە و کێشەی نێوان بووک و خەسوو هەرگیز چارەسەر ناکرێت و زۆرێک پێش ئەوەی هاوسەرگیری بکەن ئەمەیان لە مێشکیاندا چەسپاندووە، ئەمە هەڵەیە و خێزانی هاوسەرت وەک خێزانی خۆت ببینەوە و باشبە لەگەڵیان ئەوانیش بە هەمان شێوە دەبنەوە بۆت.
بە ڕوونی قسە بکە
ئەگەر تووشی کێشەیەک بوویتەوە بێدەنگ مەبە و بە ڕوونی و بەبێ ئەملاولا ڕای خۆت بڵێ و قسە بکە و هیچ شتێک مەشارەوە و ڕاستگۆبە.
باسی خراپی هاوسەرەکەت مەکە لەگەڵیاندا
دایک و خێزانی هاوسەرەکەت بە وردی هەموو کەموکوڕی هاوسەرەکەت دەزانن خۆیان بۆیە پێویست ناکات کە تۆ پێیان بڵێیتەوە و لای ئەوان باسی بکەیت.
