ناوه‌ڕۆك
پشتبەستن بە کەسانی دیکە لە پەروەردە و فێرکردنی منداڵدا
هەڵەیەک لەو هەڵە باوانەی کە هەندێ لە دایکان و باوکان دەرهەق بە منداڵەکانیان ئەنجامی دەدەن، بریتییە لە پشتبەستن بە کەسانی دیکە لە پەروەردە و فێرکردنی منداڵەکانیان.
واتە هەندێ لە دایکان و باوکان، بە پاساوی فرەکاتی، یان دوورکەوتنەوە لە ماڵەوە، یان نەخۆشی یاخود نەبوونی دەسەڵات بەسەر منداڵەکانیان و ...تاد. خۆیان لە ئەرکی پیرۆزی پەروەردە و فێرکردنی منداڵەکانیان دەدزنەوە و ئەم ئەرکە قورسە لەسەر شانی خۆیان هەڵدەگرن و دەیخەنە سەر شانی ئەسانی دیکەی وە: باپیرە، مام، خاڵ و مامۆستا و ئامۆزا و ...تاد.
ئەڵبەتە هەبوونی ئەم حاڵەتە بۆ چەندین هۆکاری جیاجای دەگەڕێتەوە، لەوانە:
- ئەم جۆرە دایک و باوکانە، بڕوا و متمانەیان بە خۆیان نییە.
- ئەم جۆرە دایک و ب باوکانە، پلانو ستراتیژییەتێکی ڕۆشن و دیاریان نییە بۆ پەروەردە و فێرکردنی منداڵەکانیان.
- ئاشنا نین بە بنەماکای پەروەردە و فێرکردنی منداڵ.
- هەست بە بەرپرسیارییەتی ناکەن و خۆیان لەو ئەرکە قورسە دەدزنەوە.
- کەسانی کەمتەرخەم و بێباکن.
- درک بە مەترسی ئەم کارە ناکەن.
- لاسایی کەسانی دیکە دەکەنەوە.
- ویست (ئیرادە)یەکی لاوازیان هەیە، بۆیە بە ئاسانی کەسانی دیکە دەست لە کاروباریان وەردەدەن.
زیانەکانی ئەم هەڵەیە
بێگومان ئەم جۆرە پەنابردنە بۆ کەسانی دیکە، زۆرترین کێشە بۆ منداڵ ودایک و باوکەکە و تەنانەت کۆمەڵگەش دروست دەکات، کە گرنگترینیان ئەمانەن:
- منداڵ بە خواست و ئارەزووی دایک و باوکی پەروەردە نابێ، بەڵکو بە ئارەزووی ئەو کەسانە پەروەردە دەبێ، کە ئەم ئەرکە دەگرنە ئەستۆ و کاریگەرییان لەسەر منداڵ هەیە.
- منداڵ هیچ بڕوا و متمانەیەکی بە دایک و باوکی نامێنێ.
- منداڵ بڕوا و متمانەی بە خۆی نابێت و ناتوانێ پەشت بە تواناکانی خۆی ببەستێت.
- منداڵ لە کاتی پەروەردەکردنیدا دووچاری زۆر شتی هاودژ دەبێتەوە.
- منداڵ بە دەست پەروەردەی فرە کەسییەوە دەناڵێنی.
- منداڵ بە شێوەیەکی سروشتی پەروەردە نابێ و لە ناو ژینگەیەکی ناتەندروستدا گەشە دەکات.
- لە ئایندەدا، منداڵ ناتوانێ وەک کەسێکی بەهرەمەند و بەتوانا خزمەت بە کۆمەڵگە بکات.
- کێشە بۆ دایک و باوکی و خێزانی دروست دەبێط.
- مەودایەکی زۆر لە نێوان خۆی و دایک و باوکی و ئەندامانی دیکەی خێزانیدا دروست دەبێت و لێک دووردەکەونەوە.
- ئەو سۆز و خۆشەویستییەی کە پێویستە لە نێوان منداڵ و دایک و باوکی هەبێت، بەرەو کزی و لاوازی دەچێت.
- منداڵ لە ژیانی خۆیدا سەرکەوتوو نابێت.
چارەسەرکردنی ئەم هەڵەیە
پێویستە دایکان و باوکان بە شێوەیەکی ڕاستەوخۆ ئەرکی پەروەردە و فێرکردنی منداڵەکانیان بگرنە ئەستۆ و ئەم ئەکرە سەختە نەخەنە سەرشانی کەسانی دیکە، بۆ ئەم مەبەستەش پێویستە ڕەچاوی ئەم خاڵانەی خوارەوە بکەین:
- هەست بە بەرپرسیارییەتی بکەن و مشوری منداڵەکانیان بخۆن.
- خۆیان لە ئەرک و کارەکانیان نەدزنەوە.
- پلانێکی تۆکمە و ستراتیژیان هەبێت بۆ پەروەردە و فێرکردنی منداڵەکانیان.
- نەهێڵن هیچ کەسێک دەست بخاتە ناو کاروباری ئەوانەوە، بە تایبەتی پەروەردە و فێرکردنی منداڵەکانیان.
- خۆیان ئاشان کەن بە بنەماکانی پەروەردە و فێرکردن.
- ڕێز لە مافەکانی منداڵ بگرن.
- خۆیان بەدوور بگرن لە کاری هەڕەمەکی.
- بڕیاری خۆیان بە دەستی خۆیان بێت.
- پێویستە بە پرس و ڕاویژ کێشەکانیان چارەسەر بکەن.
- دەبێ لە کاتی پێویستدا پرس و ڕا بە کەسانی پسپۆڕ و شارەزا بکەن.
