ناوه‌ڕۆك
ناساندن
ئەبێڵ تێسفەی یاخوود زە ویکێند (بە ئینگلیزی: The Weeknd, بە عەرەبی: ذە ویکیند). گۆرانیبێژێکی کەنەدییە لە ١٦\٢\١٩٩٠ لە شاری تۆرۆنتۆی کەنەدا لەدایکبووە.
سەرەتاکانی ژیانی
ئەبێڵ لە ١٦\٢\١٩٩٠ لە شاری تۆرۆنتۆی وڵاتی کەنەدا لەدایکبووە و بە ڕەچەڵەک ئەسیوبییە. ئەبێڵ باس لەوە دەکات کە لەگەڵ دایک و داپیری گەورە بووە و باوکی هەرگیز لەگەڵیان نەبووە، ساڵانێکی زۆر دوای ئەوەی چاوی بە باوکی دەکەوێتەوە دەبینێت خێزانێکی نوێی دروستکردووە. ئەبێڵ دەربارەی باوکی وتوویەتی: دڵنیام ئەو کەسێکی خراپ نییە بەڵام هەرگیز وەکوو باوکم نەمبینیوە. لە تەمەنی ١٧ ساڵیدا لەگەڵ ٢ هاوڕێیدا خانوویەکییان بەکرێ گرتووە و تیایدا ژیاون، بە گشتی ماددەی هۆشبەر و خواردنەوەی کحولی زۆری بەکارهێناوە کە وای لێکردووە بکەوێتە سەر شەقامەکان و ماوەیەک لەسەر شەقام بمێنێتەوە. لە ٢٠٢٠ ئاماژەی بەوە کرد کە ئەو چیتر مادەی بێهۆشکەر بەکارناهێنێت و خواردنەوە کحولییەکان زۆر کەمکردووەتەوە.
ژیانی پیشەیی
لە سەرەتادا و لە ساڵی ٢٠١٠ ئەبێڵ دوو بەرهەمی لە کەناڵی یوتوبی خۆی بڵاوکردەوە. بەرهەمەکان دەنگدانەوەیەکی زۆریان هەبوو و ڕاپەری ناسراو درەیک بەرهەمەکانی ئەبێڵی بەرز هەڵسەنگاند. ناوەکەی The Weeknd لەوەوە دروست بووە کاتێک ویستوویەتی بۆ هەفتەیەک ماڵەوە بەجێ بهێڵێت بەڵام هەرگیز نەچووەتەوە. لە ساڵی ٢٠١١ سێ میکستەیپی بڵاوکردەوە و لە ساڵی ٢٠١٢ بە کۆکراوەی ئەلبوومێکی لێ دروستکرد کە توانی چەندین خەڵات لە سەرتاسەری کەنەدا و ویلایەتە یەکگرتووەکانی ئەمریکا بەدەستبهێنێت. سەرکەوتنەکانی ئەبێڵ درێژەی کێشا و لە میانەی ساڵەکانی ٢٠١۳-٢٠٢١ چەندین ئەلبوومی بڵاوکردەوە و چەندین سەرکەوتنی گەورەیان بەدەستهێنا. هەموو کۆنسێرتەکانی بلیتی تەواوەتی دەفرۆشرا و سەرکەوتنی تەواوەتی بەدەست دەهێنا. بە درێژایی ئەم ٨ ساڵە چەندین ئەلبوومی بڵاوکردەوە و ژمارەیەکی زۆری لێدەفرۆشرا و چەندین خەڵاتی گرامی، باشترین ئەلبوومی ساڵ و باشترین گۆرانی ساڵی بردەوە.
ئەبێل بۆ بەرهەم هێنانی گۆرانییەکانی هەریەک لە (مایکڵ جاکسۆن، پرینس (شازادە) و ئاڕ کێڵی) بە هاندەری خۆی دادەنێت. ئاماژەی بەوە داوە کە هەندێک گۆرانیبێژی ئەسیوبی کاریگەرییان لەسەر شێوازی گۆرانی وتنەکەی هەیە و هەوڵدەدات شێوازەکەی زیاتر لە گۆرانی ساڵی ٨٠ـاکان بچێت.
ژیانی تایبەتی
ئەبێڵ کەسێکی زۆر داخراوە و حەزناکات کە هیچ شتێکی ژیانی تایبەتی بڵاوببێتەوە و هەوادارەکانی پێی بزانن. لە ساڵی ٢٠١٥-٢٠١٩ لەگەڵ مۆدێلی ئەمریکی بێلا حەدید لە پەیوەندی خۆشەویستیدا بوو کە دەنگۆیەکی زۆری لەگەڵ خۆیدا هێنا. ئەبێل ئاماژەی بەوە داوە لە کاتە بەتاڵەکانیدا چێژ لە سەیرکردنی تەلەفیزیۆن و یارییە ئەلیکترۆنییەکان دەبینێت.
بەرهەمەکانی
میکستەیپەکان
- House Of Ballons
- Up For Days
- Echoes Of Silence
- Thursday
ئەلبوومەکان
- Kiss Land
- Beauty Behind The Madness
- Starboy After Hours
- Dawn MF
پوختە
ئەبێڵ تێسفەی یاخوود The Weeknd لە شاری تۆرۆنتۆی کەنەدا لەدایکبووە، بە ڕەچەڵەک ئەسیوبی. لە سەرەتادا ژیانێکی ئێجگار قورسی هەبووە و بە چەندین ناخۆشیدا تێپەڕیوە و ئاماژە بەوە دەدات کە هەموو ئەو ناخۆشییانەی پیایدا تێپەڕیوە زیاتر هانیان داوە بۆ سەرکەوتن. بە شێوازی ئاڕ ئێن بی R&N گۆرانی دەڵێت و گۆرانییەکانی زیاتر شێوازێکی ڕۆمانسی لەخۆدەگرێت. بە یەکێک لە باشترین و سەرکەوتووترین گۆرانی بێژەکانی دەیەی ٢٠١٠-٢٠٢ دادەنرێت و گۆرانییەکانی بە سەرتاسەری جیهاندا بڵاوبووەتەوە.
