ناوه‌ڕۆك
سەرەنجامی سیاسی كورد لە چارەكی یەكەمی سەدەی بیست
هەر لە دوای ئەو قەیرانە ترسناکەی ڕووبەڕووی کوردستان بۆوە لە کاتی هاتنە سەر حوکمی مستەفا کەمال ئەتاتورك و عەلمانییەکان بۆ سەر تورک و ڕێکەوتننامەکان لەسەر ڕۆژهەڵاتی ناوەڕاست، ڕاستەوخۆ سوپا و هیزی تورک و عەرەب و ئینگلیز وەک سوپایەکی داگیرکەر بەربوونە گیانی خەڵکی کوردستان، ئیتر خەڵکی کورد ڕاستەخۆ لایەنە نەتەوەیەیەکەی ورووژا، نووسەران و ڕۆشنبیران و خەڵکی عەوامی کوردیش بە ئاگا هاتنەوە، کەوا نەتەوەیەکی سەردەست بە پاڵپشتی ئەو دەزگایەی (دەوڵەتی نەتەوەیی خۆی) وا زۆرداری لە کورد دەکات، بۆیە هەست و نەستی کوردایەتی بە خێرایی کەوتە نێو شیعر و نووسین و سرود و... زاراوەی وەک (کوردایەتی، کوردستانی مەزن، خەبات، شۆڕش، حزبی کوردستانی، ڕزگاری، ئازادی...هتد) دروست بوو، دۆخێکی سیاسی و شۆڕشگێری لە سەرانسەری کوردستان چەکەرە بوو، یەکێتی نەتەوەیی جێگەی یەکێتی ئیسلامی گرتەوە، ئیتر دەرگا واڵابۆوە بۆ دروستبوونی دەیان دەستە و کۆمەڵ و حیزبی سیاسی لە کوردستان، بەڵام لە پێش ئەو ڕابوونە سیاسیە، ئەوا کۆمەڵێک ڕۆشنبیر کە دوور و قووڵ و ئایندەبینن هەر زوو هەستیان بەو چارەنووسە ڕەشە کرد لەگەڵ بەرپابوونی بنەماکانی (الأتحاد والترقي)م، بۆیە ئەوانیش لەوساتی چەند حزبێکی سیاسی کوردیان دروست کردووە.
